Ajmo ljudi opet se potrudit
i linega Martina osudit.
On je krivac za sve grije tuđe
ča bi reklo naše pravosuđe.
I osudit odma ga narode
slučaj da u zastaru ne ode.
Znate da je naša pravda brižna
uvik spora, uvik nedostižna.

Lini Martin skuval nam je kašu
upropastil cilu Lipu našu.
Teško mu je nabrojit sve grije
al ne mari on se samo smije.
Sada mu se ne sudi bez veze
jerbo kriv je za nove poreze.
Misto dobreg on zaštiti rađe
i harače i velike krađe.
Dela glupost i u našem mistu
podupire nezavisnu listu.

Opet dupli bili su izbori,
kadi narod drugdi da se bori?
Rezultati vavik skoro isti
samo više ima komunisti.
To su sada i to treba znati
ne crveni nego demokrati.
A na desnoj strani loše stanje
sad ji ima točno upol manje.

Glavobolje zadaju nam stalne
ča velidu stvari nam lokalne.
Vijeće nam je slično kej prije
glavno da se dnevnica dobije.
Glavno da se čim manje talasa
dobar vijećnik ki ne pušća glasa.
Džabe knjige i divan o školi
samo muči pa te stranka voli.

Iste su nam čak i stručne službe
mili bože bome čudne družbe.
Na čelu im naš dični pročelnik
skalpa ruke baš koda je vjernik.
Tem čoviku svaki dan je teže
malo novac pa s rameni steže.
Dela posal jedan nenormalan
„Do zla boga“ proračun realan.
Pogrešku taj ispravit ne daje
samo veli „Život ide dalje“.

Za veliku mašu dobro bio
al zbog krize manje se je pilo.
Ča je bilo i ovo da znate
kad su naši ljepili plakate.
Za Jabuku oglase nosili
pa su šnjimi Krmka poklopili.
Kad je Mikas zbog teg buru digal
jedvaj Bajić premistit ji stigal.

Zna naš Martin ki će da nas spasi
super baba sa belimi lasi.
Ta je baba nikem nova dika
otkad drma misto predhodnika.
A prethodnik velidu bil prije
konjska glava zna se ke partije.
Mislili su boljeg bilo nebi
dok ni počel punit žepe sebi.
Kad je vidil da više nemore
s „Malo vitra“ pobiže na more.
Opet je til na svoju stolicu
al je dobil nogom u guzicu.

Još je jedan ministar u briga
siromak je postal druga liga.
Sminiše ga okolo se veli
jerbo novce čuva na Sejšeli.
Kemu nisu financije tanke
da ji čuvat u domaće banke.
A na znanje neka bude svima
da domaći banki opće nima.

Prstom upril Polančec u Stipu
bome mu je skuval kašu lipu.
Podravka jim bila bojno polje
Lini Martin ukrast bi znal bolje.
Onda Stipe preokrenu ploču
sad Polančec i njegovi joču.
To se ne zna ki je lopov veći
u rešetka sidi niki treći.
Ni niš bolje ni u Viktor Lencu
isto žedan kamen na studencu.
A Slavonci, ča je kod vas novo
nesta žito slosa Đakovo.
Ukralo vam par stotina šlepa
i ča sada neka seljak krepa.
Nepoznati pobrali su vrnje
a seljaku iz rezerve zrnje
Niki dobi malo, niki niš
a najviše popapal je miš.

Predsjednički izbori su bili
čudni svati, ajme Bože mili.
I tote su prognoze dost sive
došal nam je opet novi Ive.
Podtžava muzičare stare
pivače i razne guzičare.
Baš ga briga za oneg ki krampa
važno da se puni kasa ZAMP-a.
Dosta čudno da ga narod voli
kad se Ive ni Bogu ne moli.
Lini Martin iz našega mista
isto je kej Ivo ateista.

Falidu se neki čudni stvori
skoro ćedu svršit pregovori.
Ludi Martin temu se veseli
u Evropu i sam luđak želi.

Jerbo jamu ispod nas ti kopa
svaki kem je najpreča Europa.
Kad nas primi onda će nas stisnut
da vidimo ki će onda pisnut.
Neće svaka kuća kej i prije
mirišat od pečenja rakije.
Kupovat ćedu se samo marke
niki neće smit istiskat čvarke.
Nećeš pojt na ucvarke kod strine
smit ćedu se jist samo iz Kine.

Ima novost s područja kulture
propivale su oštarske cure.
Svaki šnjimi more da se fali
ča veliki i ča oni mali.
Lipo ji je mili Bože vidit
bolje pivat nego doma sidit.
Ipak jedna stvar nas dosta plaši
ne čuju se više tamburaši.
Ne čuje se tamburaška žica
otkad dica više nisu dica.

Proradili i sportski tereni
oni beli i oni zeleni.
Jedino ča na tereni smeta
ča se psuje oko nogometa.
Zato ja bi preporučil dici
bolje vam je bit na Viničici.
Dojt je tamo prava je milina
ima polic, slanine i vina.
Svačega se tamo vidit more
da se zimi avtom lapat ore.

Ča se tiče brda Viničica
samo fali jedna mu sitnica.
Trebala bi jača nam žičara
jer je ova i slaba i stara.
Neki teži kada na nju sedu
u dragu je s brda povučedu.

Vatrogasci rješili vozila
pa godina dosta slaba bila.
A vozila baš su sada lipa
složiše ji Lega i ekipa.
Predsjedniče moreš s njimi svirat
jer ni novac neš ji registrirat.
Ni niš bilo novac za izlete
a ni nošnje venca za sisvete.
Svakakvi se čuli komentari
keg špotaju taj za to ne mari.

Lin Martine kriv si za sve grije
nek ti Lećka presudi čim prije.
A sad dosta, spalit ćemo gada
raspala mu se dabogda vlada.
Kad izgori taj naš Lini Martin
metnut ćemo naše maske na klin.
Metnut ćemo tambure u ruke
i zapivat za njegove muke.

Keg pogodi ova naša rima
taj u glavi baš sve daske nima.
Mačkari su, to se mora znati
svaki more ča oće da klati.
Ni nam više za divanit lazno
da korito ne ostane prazno.
A korito puni to da zanate
Ogulinac po imenu Mate.
Za mačkare taj karminu sprema
ki ni mačakr za njeg klope nema.
Drugi put si neka masku najde
a danas se kod Bože nek snajde.
Do drugi put, ča se ono veli
sretni bili, zdravi i veseli.

Anton Božičević